François, Francescu Battestini, memoria paisana.

Benchè stendu in Valrose, quaiò vicinu à l’Ortale, longu a strada naziunale, Francescu avia sempre in mente u so paese nativu di Rutali induve ci hà campatu è li piacia à ricullà ad ogni occasione. Da pastore, ellu ne cunniscia ogni locu ch’ell’avia praticatu cù e so capre. Cum’è per u so babbu, Michele « u sciuccaiu » chì curava e sciocche di u paese è chjamava a mane à son di cornu, u mistieru pasturinu li piacia. D’altronde tandu, ùn ci n’era tant’altri ed era u guadagnapane ma meritatu perchè stantatu. Ùn era tantu faciule per via chì ci vulia à avè i reghjoni è pagalli, fà attenzione à i danni in i lochi cultivati. Infine chì, da a serra di Rutali à a piaghja di Borgu Biguglia, ellu cunniscia ogni scornu. Avia a simpatia di tutti i paisani è di tutti quelli chì l’anu avvicinatu. Anzianu cumbattente ne era fieru, anzianu pastore dinù. Ci perdimu un gran testimoniu di a vita passata campagnola.
Raghjunghje a so moglie Mimì è u so figliolu Michel ch’ell’avia avutu a disgrazia di perde, raghjunghje dinù l’altri di i soi cari, dopu à una vita riempiuta di gioia è di pene. Lascia à tutti u rimaricu.
Cundugleanze à tutta a so famiglia ind’u dulore.
Riposa in pace, o Francè, t’avemu per u sempre in u nostru core. Chì u Signore cun tutta a Corte celeste t’accogli in Paradisu.

Louis