PASSENDU...

U carru di a lingua_2

Oghje, ind’u carru, eccuci una puesia di Anghjulu SALDUCCI, natu in Soriu di Tenda, di mamma rutalaccia. Anghulu ne hà fattu una canzona chì mi cummove ogni volta ch’ellu a mi canta. « Un alitu di ventu » chì face vene à gallu un ricordu dulurosu di zitellina. Magia di a puesia è di u cantu…

Un alitu di ventu 

Un alitu di ventu, ghjustu s’ellu sumena

appinuccia di nebbia, à orlu di a mo pena

Seranu i mo sonnii incirmuliti appena

o ‘ssu stranu viaghju dund’ellu si rimena

È sott’à l’alivone un’ombra s’hè calata

per copre u secretu d’una petra zuccata

duv’è tù ci pusava a sera à l’attrachjata

tù u mo spannacore tù a mo innamurata

A to presenza à noi o quant’ella ci manca

u ricordu passatu veghja ma ùn si stanca

à dittile ‘sse cose u core si spalanca

cum’ una voce persa quassù in la calanca

O dolce voglia fammi tù leia

trà voce soia è voce meia

Caruccia hè per mè ‘ssa voce chì sbucina

tutta a mo giuventù in la to curtalina

À sentela trimà pare cusì vicina

ma ‘ssu stranu viaghju ci ghjoca in pulvina

Un alitu di ventu in la notte amarena

à l’ora di scumparte, à l’ora di fà cena

di la cità maiò pudè rompe catena

ritruvà u paese è corre à stanca lena

È sopr’à l’alivone un’ombra s’hè pisata

per scopre u secretu d’issa petra zuccata

duv’è tù ci pusava a sera à l’attrachjata

mammona o mammuccia,

mammona o mammuccia, a mo inzuccarata

O dolce voglia fammi tù leia }

Trà voce soia è voce meia } ( bis)

Vucabulariu :

Un alitu di ventu (àlitu) : un souffle de vent

Notte amarena : nuit d’amertume, de chagrin

À orlu di : au bord ( à orlu di mare, di strada…)

Incirmuliti : échevelés

Dunde : là où ( dund’è vo passate voi, lasciate la calamita). Comme duve, induve (où), cume, quantu, s’élide devant le pronom personnel

Si rimena, de riminassi : s’agiter, remuer légèrement

Petra zuccata : pierre de taille

U mo spannacore : mon baume au cœur

Si spalanca, de spalancassi : ouvrir tout grand

Pulvina : poussière. Andà in pulvina : aller en poussière

Scumparte : partager

À stanca lena : jusqu’à perdre haleine ( sfiatassi)