PASSENDU...

 U carru di a lingua_6

Pace è salute à tutti !

Pace è salute ! Eccu quì duie parolle chì portanu e speranze d’ognunu à u sbuccià di l’annu novu. Duie parolle arradicate ind’a nostra storia fatta di tante miserie è di viulenze interne o venute d’altrò. A salute hè un capitale persunale datuci à a nascita è chì richere da se stessu cura durante a vita sana. A pace, ella, hè un tesoru cumunu è dunque l’affare di tutti. Ne parleremu una prussima volta di a pace. Oghje m’impreme assai di parlavvi di quelli chì, per diverse ragione, sò offesi ind’a so persona è chì anu bisognu di sustegni è di primurose accolte. Di core, li preghemu un bon’annu !

Minnia

Minnia si ne stà à u purtellu

è guarda a ghjente passà

aspetta u so principellu

è u cennu ch’ellu li ferà.

Batti batti batticore

hè cusì bellu meu l’amore

O s’o fussi un acellu

è cum’è ellu sapè vulà

li diceria à issu zitellu

oghje per tè vogliu cantà

Cantà un versu raru

cun note scelte per dì

Ti tengu tantu caru

è poi attempu smarì

chì mi serebbe tropp’ amaru

d’ùn avè più altru à dì

Un ghjornu li disse sò belli

l’ochji toi o Minnì

u to surrisu hè di quelli

chì aiutanu à campà quì

Batti batti batticore

hè cusì zittu meu l’amore

U mondu eo vulia corre

è u mo caru pedighjà

vulia fà è po succore

i cori vioti di u sperà

O lacrime mee cusì calle

pudete puru falà

annantu à e mo dinochje gialle

ùn state tantu à ghjalà

solu l’edee sò farfalle

è vanu senza stancà.

Batti batti batticore

hè cusì piattu meu l’amore

hè cusì piattu

cusì zittu

cusì bellu

meu l’amore

Vucabulariu :

Chì sò offesi : ici, qui ont une infimité, un handicap

Batticore(u) : battement de cœur, palpitation

Pedighjà : suivre les pas de

Dinochje : genoux. À noter que certains mots du genre masculin ont un pluriel féminin ( u dinochju, e dinochje ; u bracciu, e bracce ; u ditu, e dite ; u schincu, e schinche ; u lenzolu, e lenzole)

(Fringhellu)