PASSENDU...

Dicianu, in tempi d’una volta, chì ronchi di sumeri ùn ne cullava in celu, è ancu menu d’abbaghji. Oghje, smariti sò i sumeri ma micca i ronchi. I media muderni li danu spaziu è ribombu fenduli francà mari è mondi. A parolla piatta chì punghje s’hè sciolta, taglia è cosge flacchine à voline più è mette u vituperiu in ogni locu. A parolla assinnata si ne stà bassa chì hà u suspettu addossu di a dibulezza è di u lasciacorre. Imbufuniti ch’è no simu da i ronchi (frà i quali ci mettu u meiu) u silenziu bramatu diventa un tesoru. O chì piacè di stallu à sente quand’ellu pasce ind’u so reghjone è di sentelu, à stonde, zuccà u cantu di un acellu ! Ma ci vole à esse attenti à u silenziu quand’ellu piglia a faccia di l’addisperu è di a sottumissione.

"Silenziu"

D’induve sì silenziu cà

Di l’alte cime etteree

Di e fundure parimee

Di nisun locu ad adestrà?

Eri attornu à u fucone

À di le volte cusì greve

In cori ci era u pisone

Di u cuperchjulu di neve

Ti stai fittu minerale

In a parolla ch’ùn esiste

Per dì u bellu è ancu u male

À quale omu ùn sà resiste

Ind’è a candita alimea

Ci dormi incù u to secretu

Hè cusì dolce cos’hè chetu

Cunsolu di l’anima mea

Ma sì dinù forse u mughju

Ch’orbu trapana più d’un desertu

Sì u luciore ch’in u trabughju

Piglia u volu alispertu

D’induve sì silenziu caru ?

D’où es-tu cher silence

Des hautes cimes éthérées

De mes propres abîmes

D’aucun lieu à apprivoiser ?

Tu étais autour du "fucone"

Parfois si lourd

Avec dans les cœurs le fardeau

Du couvercle de la neige

Tu résides dur minéral

Dans la parole qui n’existe

Pour dire le beau et même le mal

A qui nul homme ne résiste

Dans le cédrat confit

Tu dors avec ton secret

C’est si doux ce qui est quiet

Consolation de mon âme

Mais tu es aussi le cri

Qui perce aveugle les déserts

Tu es la lueur dans les ténèbres

Prenant son vol ailes déployées

D’où es-tu cher silence ?

(Fringhellu)