Le stade di u Lupinu, décrit par G B Giacomoni

 

"Ci serebbe tantu à dì di u Lupinu. Ghjé statu u locu beatu di a nostra zitellina, tempi passatoni. Quì si n’hè vissutu sforzi è sfoghi, gioie è dilusione, affronti è imbaruffate di quelle. Di ricordi nè avemu cantare cerbellesche piene. U primu chì mi vene in core à mè ghjè a cuntentezza mea à l’entrata, tantu aspettata, di l’ASR nantu à u terrenu. Rivecu u nostru « goal », u famosu Ghjiseppu Bragoni , cunduce di corsa a nostra squadra infilarata è fà in u chjerchju centrale incalcinatu una « chandelle » chì prumettia un azzuffu maiò. Dopu pensu à i travagli chè no’ duviamu fà, noi sculari, da ingrandà è spianà sempre un pocu di più u nostru staddu, per avè l’accunsentu di pudè ghjucà. Quessa era a regula educativa principale di i nostri maestri di tandu : prima u travagliu è dopu a ricumpensa, u ghjocu. M’arricordu di l’unicu pallò ch’ellu ci vulia à tene contu. À quandu era a buscica à impezzà, à quandu era u coghju à riparà ( tandu era André Ratti, u scarparu, chì intervenia). Dopu à ogni partita, ci vulia à unghjelu cù u seiu di u porcu. Ma attenti à e prime capate, dopu ind’u Lupinu, chì e petricelle ci si appicicavanu. Issu pallò riprisentava una furtuna per noi, piuttostu avvezzi à ghjucà nantu à a Traversa, cù i stucci o cun stracci imbucinati dentru à una vechja calzetta. Pensu à i nostri maestri duverosi di tandu, severi ma ghjusti, generosi tantu di sapienza è di fatti, chì sapianu à la mente i nostri dafà perchè ghjeranu ghjente di i nostri lochi.À mè mi piaceria ch’una testimunianza publica di ricunniscenza sia fatta à dui di ssi maestri di prima trinca ch’eranu Dominici è Andreani. Si puderebbe dà, per esempiu, u nome di u primu à u chjassu chì và da a Villa à u Lupinu è chjamà a Traversa « Traversa Andreani », locu di a nostra corte di ricreaziò di tandu è locu induv’ellu stava. Benintesu ùn sò micca i soli rutalacci da merità una tale ricunniscenza. Ma ci hè altri lochi da chjamà è altre manere da metteli in memoria. Amicizie tante," Jbg