PASSENDU

  U carru di à lingua_7

Cunniscimu e bellezze di i nostri celi isulani (ne avemu vistu e prove ’sti ghjorni scorsi), u splendore di i nostri lochi marini o muntagnoli, avemu fiumicelli d’argentu è paisoli d’oru, avemu u clima chì ci face apprezzà e quattru stagione, avemu frutta è robba bona fatta quì, avemu intelligenze è sapè fà… N’avemu tante ricchezze in noi è in giru à noi ! « Ma allora, mi dicerete, simu in paradisu ! »--« Nò, ùn ci simu ancu ! Ci hè un scalone à francà per pudè campallu in terra nostra ‘ssu paradisu è ‘ssu scalone si chjama a pace ». Ma a pace, si face ! Ghjè una custruzzione cumuna. Ognunu deve purtà a so petra per ‘st’opera maiò. Dateli un nome à a vostra petra : chjamatela tulleranza, amicizia, rispettu, pazienza, arte, ghjustizia, aiutu, ascoltu, succorsu, alegria, fratellanza…chjamatela amore… o chì ne sò ancu. Pigliemu, per indettu, u casu di ‘stu media quì. Hè una furtuna d’avellu s’ellu hè u portavoce di tutti, s’ellu porta i valori in cunfurmità cù i nomi di e nostre petre scritte più sopra. È omu s’accorge tandu ch’ellu ùn pò micca accettà scritti chì portanu u dispettu, l’odiu, a maldicenza, impruperii …chì sò trivuli di pace. Da godelu u paradisu, ci hè qualchì passu à fà è un pocu d’orgogliu à ingolle, di ghjuviziu à mette.

Oghje, palisendu a mo niscentria, a petra ch’o portu si chjama "Canzona zitella". L’amore hè zitellu, si sà. Dateli u versu quellu chì apre i cori.

Trè note trè note

per aria culà

Trè note da scote

a felicità

Campane campane

pudete sunà

Mescite funtane

rivocchi d’amà

Oghje sì chì l’emu da fà

a festa a festa

Oghje sì chì l’emu da fà

a festa o mà

Canzona acelli

cantatelila

Cantate zitelli

un versu d’avà

Di gioia è di fiori

l’emu da carcà

Sò pieni i cori

d’amore à dà

Oghje sì chì l’emu da fà

a festa a festa

oghje sì chì l’emu da fà

noi tutti o mà

(Fringhellu)

Vucabulariu :

Omu s’accorge (accorgesi) : on se rend compte

L’odiu : la haine

Impruperii  (impruperiu au singulier mais s’emploie surtout au pluriel) : termes injurieux, blessants

Trivuli di pace ( u trìvulu : bugrane, plante épineuse appelée aussi arrête-bœuf ) : épines pour la paix. Un trivulu di casa se dit de quelqu’un qui se comporte mal en famille. Même signification pour trivulu di paese.

Ingolle ( o inghjotte) : avaler