PASSENDU

U carru di a lingua_8

A vita hè fatta à scala, à chì colla, à chì fala. Eu sò piuttostu ind’a falata è mi si pare ancu chì u tempu, qualchì volta anch’ellu, pigli l’abbriu ind’a falata. Ùn ne hà frenu ellu. Si campa l’oghje cù a nustalgia di l’eri è u timore di dumane. Ma, in verità, sò i giovani chì, cù a nostra lascita è i mezi d’avale, sò in u cunfrontu cù l’oghje. Sò elli, in più, chì anu da impastà à Dumane. Dunque, per contu meu, ùn aghju micca cunsigli à dalli, ma dilli a mo fede in elli quessa sì.

Serenu*

U mare hè di matreperla

ùn trema mancu una ferla

e cullette si sò urlate d’oru

hè l’ora di pigliassi un scioru

Un dolce serenu m’imbucina

un battellu sguilla a so fiura di China

una stella accende un maghju

in portu u fanale traccia u so raggiu

À u cinnulà di i lumi

luparelli abbramati

escenu da e so tane

Sò d’annasu à prufumi

è à cibi aspettati

in ochjate furdane

A notte oramai hè à elli

è per noi l’anziani

suspiri urfanelli !

*serenu sanfiurenzincu : u serenu, c’est le calme et la fraîcheur du soir, en été

Vucabulariu :

Piglià l’abbriu : prendre l’élan

A matreperla : la nacre

A ferla : la férule

Piglià i so sciori : prendre ses aises

Luparelli abbramati : jeunes loups affamés

Ochjate furdane : oeillades canailles

U cinnulà di i lumi : le clignotement des lumières

Sò d’annasu : ils flairent

I cibi (u cibu=la nourriture) aspettati : les mets espérés
Nota : la traduction littérale de ce poème sera proposée si la demande en est faite.